Sajak

Deni Hadiansah

KI SOBAT DI PANGUMBARAAN

Kungsi urang leumpang, babarengan rarampeolan

Tulag tolog titincakan, nyungsi ajen kahirupan

Nimbang-nimbang kahariwang, ngudag-ngudag kabagjaan

Awak ngagubra, beuki lungse beuki nahnay

Waktu urang nahan renghap, keteg angen jeung jajantung

 

Kungsi urang reureuh handapeun caangna bulan,

Nogencang taya bentang, uyup- ayap kapoekan

Babarengan ngalalana, ngupahan rasa sungkawa

Nguyup elmu, nguras tanaga

Nyukcruk raga, nu longkewang sagala tuna

 

Renghap urang babarengan, ngadedempes teu empes-empes

Keur ngintip lolongkrang nasib

Geus deukeut ngabecir ngacir

Diudag digupayan, balebat caang ngupahan

Tapi urang sapikiran, nyusud tapak di lemah pangumbaraan.

 Bandung, 2002-2903. 

 

 

BANDUNG JEUNG BOGOR

Dua kota nu paanggang

Antara Bandung jeung Bogor

Dua hate nu geus puguh

Lir cai walungan ngocor

 

Citarum nu jadi saksi

Urang geus pageuh jangji

Mo luntur deui

Najan kapegat pati 

Kintunan : Moh. Bakti.S